असार २ गते ।७० वर्षे उमेरहद उपयोगी नभएकाले पार्टीले सो उमेरहदको बन्देज हटाउने निर्णय गर्नुपरेको नेकपा (एमाले) का अध्यक्ष केपी शर्मा ओलीले बताउनुभएको छ । ७० वर्ष माथिकाले काम गर्न सक्ने अवस्थामा पनि राजनीति छोड्नुपर्ने अप्ठ्यारो अवस्था आएपछि सो उमेर हद हटाउने निर्णय भएको उहाँको भनाइ छ ।
शनिबार च्यासलस्थित पार्टी केन्द्रीय कार्यालयमा आयोजित कार्यक्रममा उहाँले चीनलगायतका दुनियाँका सबै पार्टीहरुले परित्याग गरिसकेको उमेरहद हटाउने निर्णय भएको प्रष्ट पार्नुभयो । केहीले पार्टीको सो निर्णयको विरोध गरेर अराजनीतिक कुरा गरेको उहाँको भनाइ छ । अध्यक्ष ओलीले पार्टीका युवाहरुलाई ७० वर्ष कटेकाहरुसँग प्रतिस्पर्धा गरेर महाधिवेशनमा अध्यक्ष, उपाध्यक्ष, महासचिव बन्न आग्रह गर्नुभयो ।
काम गर्न सक्छन् भने ७० वर्ष कटेकालाई पार्टीभित्र प्रतिबन्ध लगाउनुपर्ने कुनै कारण नरहेको अध्यक्ष ओलीको भनाइ छ । उहाँले काम गर्न सक्नेलाई उमेरहदको नाममा जिम्मेवारीबाट रोक्नुपर्ने कुनै कारण नरहेको बताउनुभयो
