काठमाडौँ– प्रधानमन्त्री निवास बालुवाटारमा आइतबार प्रधानमन्त्री केपी शर्मा ओलीले थ्री नेसन्स कपको उपाधि विजेता राष्ट्रिय फुटबल टिमका खेलाडीलाई पुरस्कृत गर्दै १३ औँ साफ आयोजना गर्न नेपाल तयार रहेको बताएका छन् । प्रधानमन्त्री ओलीले अखिल नेपाल फुटबल संघ (एन्फा) र राष्ट्रिय खेलकुद परिषद (राखेप) लाई साफ आयोजनाको तयारी अघि बढाउन समेत निर्देशन दिए ।
आयोजक राष्ट्र बंगलादेशले प्रतियोगिताबाट हात झिकेपछि नेपालमा साफ आयोजना गर्न एन्फाले दाबी पेश गरेको छ ।
(
कार्यक्रममा प्रधानमन्त्री ओलीले थ्री नेसन्स कप अन्तर्राष्ट्रिय फुटबलको उपाधि विजेता नेपाली राष्ट्रिय फुटबल टोलीलाई जनही ४ लाख नगदसहित पुरस्कृत गरे । यस अघि नै सरकारले घोषणा गरेको पुरस्कार आइतबार खेलाडीलाई प्रदान गरेको हो । पुरस्कार पाउनेहरुमा २३ जना खेलाडी, प्रशिक्षक बालगोपाल महर्जन, सहायक प्रशिक्षक किरण श्रेष्ठ र गोल किपिङ प्रशिक्षक विकास मल्ल रहेका छन् । राष्ट्रिय टोलीका कप्ताल किरण चेम्जोङले पुरस्कार ग्रहणपछि सरकारले आफूहरुको हौसला बढाएको बताए ।
नेपालले गत चैतमा भएको प्रतियोगितामा बंगलादेशलाई २–१ गोल अन्तरले पराजित गर्दै उपाधि जितेको थियो । उक्त फाइनल हेर्न प्रधानमन्त्री ओली दशरथ रंगशाला पुगेका थिए ।
