इटाली लगातार चौथो पटक युरो 2020 को क्वार्टरफाइनलमा
शनिबार राति लन्डनस्थित वेम्ब्ली स्टेडियममा भएको खेलको निर्धारित ९० मिनेटको खेल गोलरहित बराबरीमा टुङ्गिएपछि खेल अतिरिक्त समयको ९५औं मिनेटमा फेडेरिको किएसाले र त्यसको ६ मिनेट नबित्दै माटेओ पेस्सिनाले गोल गर्दै इटालीलाई अग्रता दिलाएका थिए ।
दुई सब्स्टिच्युट खेलाडीको निर्णायक प्रदर्शनपछि इटालीले अतिरिक्त समयको पहिलो हाफमै दुई गोल थप्यो । अतिरिक्त समयको पहिलो हाफमा २-० ले पछि परेको अस्ट्रियाका लागि पनि सब्स्टिच्युट खेलाडी सासा कलाड्जिकले ११४औं मिनेटमा एक गोल फर्काए ।
अस्ट्रियालाई अतिरिक्त समयमा पराजित गर्दै १९६८ को च्याम्पियन इटाली युरो २०२० को क्वार्टरफाइनलमा पुगेको छ । जितसँगै २००४ यताका सबै युरोपियन च्याम्पियनसिपमा इटालीले कम्तिमा क्वार्टरफाइनलको यात्रा तय गरेको छ ।
