पार्टीका नेता डा. भीमबहादुर रावलसँग संवाद गर्न नेकपा (एमाले) ले तीन सदस्यीय संवाद टोली गठन गरेको छ । एमाले का पूर्व उपाध्यक्ष रावल पछिल्लो समय पार्टी गतिविधिबाट असन्तुष्ट रहँदै पार्टीको विधि र विधान विपरीत गतिविधि गरिरहेको निष्कर्ष निकाल्दै संवादका लागि पार्टीका उपाध्यक्ष विष्णु पौडेलको संयोजकत्वमा तीन सदस्यीय संवाद टोली गठन गरिएको उपमहासचिव पृथ्वीसुब्बा गुरुङले जानकारी दिनुभयो । टोलीमा पार्टी सचिव एवम् सुदूरपश्चिम प्रदेश कमिटीका इन्चार्ज लेखराज भट्ट र सहइन्चार्ज कर्ण थापा सदस्य रहनु भएको छ ।
संवादपछि नेता रावल सच्चिएर आएमा उचित जिम्मेवारी दिइने एमालेले जनाएको छ । यद्यपि नेता रावलले आफू पार्टीको हितमै काम गरिरहेको दाबी गर्दैआउनुभएको छ । नेता रावल पार्टीको हित विपरीत कदम चालेकाले संवादगरी आवश्यक निर्णय लिन संवाद टोली गठन गर्नुपरेको उपमहासचिव एवम् प्रचार विभाग प्रमुख गुरुङले बताउनुभयो ।
हालै सम्पन्न प्रतिनिधिसभा र प्रदेशसभा निर्वाचनमा पनि नेता रावलले पार्टीलाई सहयोग नगरेको स्थानीय पार्टी नेता तथा कार्यकर्ताहरूको गुनासो आएपछि एमालेले त्यसबारे वार्ता गर्न उच्चस्तरीय टोली नै गठन गरेको जनाएको छ ।
