चैत १७ गते । शुक्रबार प्रधानमन्त्री पुष्पकमल दाहाल ‘प्रचण्ड’ले सरकारलाई पूर्णता दिने हुनुभएको छ ।बिहीबार सत्ता गठबन्धनको बैठक पटक–पटक बसेको थियो तर सहमतिमा ढिलाइका कारण मन्त्रीहरूको शपथग्रहण शुक्रबारका लागि तय गरिएको प्रधानमन्त्रीको निजी सचिवालयले जनाएको छ ।
बिहीबार बिहान र बेलुका गरी सरकारलाई पूर्णता दिनका लागि दुई पटक बैठक बसेको थियो तर प्रधानमन्त्री को व्यस्तता र दलहरूको आन्तरिक तयारीका कारण मन्त्रिपरिषद् विस्तार शुक्रबारका लागि सारिएको सचिवालयले जनाएको छ । प्रधानमन्त्री प्रचण्ड गठबन्धनको बैठक चलिरहेकै बेला चितवनको कार्यक्रमा सहभागी हुन उता जानुभएको थियो भने यता दलहरूको पनि आन्तरिक तयारी पूरा भएको थिएन । बिहीबार हुने भनिएको मन्त्रिपरिषद् विस्तार यी दुवै कारणले हुन नसकेको सचिवालयले जनाएको छ ।
प्रधानमन्त्रीका प्रेस सल्लाहकार मनहरि तिमिल्सिनाका अनुसार शुक्रबार बिहान एक चरण बैठक बसेर मन्त्री र मन्त्रालय चयनको विषयलाई अन्तिम रूप दिइनेछ । त्यसपछि नयाँ मन्त्रीहरूको शपथग्रहण गराइनेछ ।
