कतारमा जारी २२औं संस्करणको फिफा विश्वकप फुटबलको नकआउट चरणमा ब्राजिल प्रवेश गरेको छ ।
दोहास्थित स्टेडियम ९७४ मा सोमबार राति भएको खेलमा ब्राजिलले स्वीट्जरल्यान्डलाई १-० गोलले हरायो । लगातार दोस्रो जित निकालेको ब्राजिल एक खेल अगावै अन्तिम १६ मा पुगेको हो । पहिलो खेलमा ब्राजिलले सर्बियालाई २-० गोलले हराएको थियो । ब्राजिलको जितमा क्यासेमिरोले निर्णायक गोल गर्नुभयो । उहाँले ८३ औं मिनेटमा रोड्रिगोको पासमा गोल गर्दै ब्राजिललाई जिताउनुभयो । यस जितसँगै ६ अंक बनाएको ब्राजिल समूहको शीर्षस्थानमा छ । ब्राजिल विश्वकपको नकआउट चरणमा पुग्ने दोस्रो टोली हो । यसअघि समूह ‘डी’ बाट साविक विजेता फ्रान्सले अन्तिम १६ मा स्थान बनाईसकेको छ ।
