कतारमा जारी फिफा विश्वकप फुटबलमा नेदरल्यान्ड्सले विजयी सुरुआत गरेको छ ।
सोमबार राति दोहास्थित अल थुमामा स्टेडियममा सेनेगललाई २-० गोल अन्तरले हराउँदै नेदरल्यान्ड्सले सुखद सुरुआत गरेको हो ।
कोडी गाक्पो र डाभी क्लासेनले नेदरल्यान्ड्सलाई जित दिलाउन एक एक गोल गरे ।
पहिलो हाफ गोलरहित बराबरीमा सकिएको खेलको दोस्रो हाफमा नेदरल्यान्ड्सले दुबै गोल गरेको थियो ।
गाक्पोले फ्रान्की डी जोङको पासमा खेलको ८४ औं मिनेटमा हेडमार्फत उत्कृष्ट गोल गर्दै नेदरल्यान्ड्सलाई सुरुआती अग्रता दिलाएका थिए ।
विश्वकपको डेब्यु खेलमा गाक्पोले गोल गरेका हुन् ।
त्यसपछि खेलको इन्जुरी समयमा क्लासेनले गोल गर्दै नेदरल्यान्ड्सलाई २-० को जित दिलाए ।
यस जितसँगै नेदरल्यान्ड्सले पहिलो खेलमै ३ अंक जोडेको छ ।
समूह 'ए' मा रहेको नेदरल्यान्ड्स दोस्रो स्थानमा रहेको छ । सेनेगलले भने हारबाट विश्वकपको सुरुआत गरेको छ ।
सेनेगल तेस्रो स्थानमा रहेको छ ।
